ఇది సినిమా కథలాగే ఉంటుంది.. కానీ నిప్పులాంటి నిజం.. ప్రేమలో ఎంత త్యాగముందో చెప్పే వాస్తవం.. నమ్ముకున్న సిద్ధాంతంకోసం నమ్మిన వారివెంట నడిచిన జీవితం.. అడవి బిడ్డలకోసం బావ ముళ్లబాటను ఎంచుకుంటే , దాన్నే పూలబాటగా చేసుకొని విప్లవోద్యమంలో బావతో కలిసిపోరాడి , మూడురోజుల వ్యవధిలో బావతోనే ప్ర్రాణాలొదిలిన సమ్మక్క అలియాస్ బారతక్క జీవితం.. మావోయిస్టు టాప్ లెవెల్ లీడర్ హరిభూషణ్ మరణం తరువాత రెండు రోజుల వ్యవధిలో ఆయన భార్య బారతక్క కూడా చనిపోయింది. హరిభూషణ్ , బారతక్క బావామరదళ్ళు .. బావ హరిభూషణ్ చదువు పూర్తయ్యాక , పెళ్లిచేసుకుందామనుకుంది..
అయితే బావ ఉద్యమబాట పట్టి అడవులకు వెళ్ళిపోయాడు.. సమ్మక్క అలియాస్ శారద మాత్రం బావతోనే జీవితమనుకొని అదే అడవి బాటపట్టింది. తల్లితండ్రులు , బంధువులు యెంత వారించినా వినలేదు.. చావును కోరితెచ్చుకుంటున్నావని , అడవుల్లో ఉండలేవని చెప్పినా ఆమె చెవికి ఎక్కలేదు.. బావ కోసం అడవిబాట పట్టింది.. తుపాకీ చేతపట్టింది.. భావనే పెళ్లిచేసుకుంది.. అతడితోనే అడవితల్లి ఒడిలో ఒదిగిపోయింది.. ఉద్యమంలో ఉన్నారు కాబట్టి , బిడ్డలు కూడా వద్దనుకుంది. మధ్యలో అనారోగ్యం వస్తే ఇంటికొచ్చి , కొంతకాలం ఉండి , మళ్ళీ బావను వెదుక్కుంటూ వెళ్ళిపోయింది.
మళ్ళీ తుపాకి చేతబట్టి భర్త ఆశయాలకు అండగా ఉండిపోయింది.. బావతోపాటే ఎన్నో ఎన్ కౌంటర్లు తప్పించుకున్నా , కరోనా ఎన్ కౌంటర్ నుంచి ఇద్దరూ తప్పించుకోలేకపోయారు.. 21 న హరిభూషణ్ , 24 న సమ్మక్క అలియాస్ బారతక్క చనిపోయారు.. సమ్మక్క మరణవార్తను ఛత్తీస్గఢ్ పోలీసులు ధ్రువీకరించారు. కానీ, మావోయిస్టు పార్టీ ఇంకా ఎలాంటి ప్రకటనా చేయలేదు.
