కరోనానుంచి బయటపడినా.. కామాంధులు ఆ తల్లీకూతుళ్లను వదల్లేదు. ఆస్పత్రినుంచి ఇంటికి తిరిగెళ్తున్నాం, ఆరోగ్యం బాగోలేదు, కనికరించండి అని వేడుకున్నా సరే తమ పశుత్వాన్ని చాటుకున్నారు. తల్లీ కూతుళ్లను దారుణంగా రేప్ చేశారు. ఈ ఘటననుంచి కూతురు తప్పించుకుని బయటపడగా.. తల్లిని చిత్రవధ చేశారు. ఆమె ప్రస్తుతం ప్రాణాపాయ స్థితిలో ఉంది.
అసోంలోని చారయ్ దేవ్ ఆస్పత్రిలో తల్లీకూతుళ్లిద్దరూ కొవిడ్ కారణంగా ఆస్పత్రిలో చేరారు. చికిత్స అనంతరం నెగెటివ్ రావడంతో వారిద్దరూ డిశ్చార్జ్ అయ్యారు. సొంత ఊరికి పోయేందుకు డబ్బులు లేకపోవడంతో ఆస్పత్రివారిని సాయం అడిగారు. వారు కూడా కుదరదని చెప్పడంతో గత్యంతరం లేక కాలినడకన ఊరికి బయలుదేరారు. మార్గమధ్యంలో టీ తోటల్లో కొంతమంది యువకులు తల్లీ కూతుళ్లను అటకాయించారు. ఆస్పత్రినుంచి ఇంటికి వెళ్తున్నామని చెప్పినా కూడా వదల్లేదు. వారిని దారుణంగా చెరబట్టారు. మరికొంతమంది స్నేహితులకు ఫోన్ చేసి వారిని కూడా రమ్మని చెప్పారు కామాంధులు. ఇంతలో కూతురు తప్పించుకుని పోయి గ్రామస్తుల సాయంతో పోలీసులను తీసుకొచ్చింది. ప్రస్తుతం తల్లి పరిస్థితి విషమంగా ఉంది.
