యావత్ సినీప్రియులు ప్రస్తుతం ఆర్.ఆర్.ఆర్ రిలీజ్ కోసం ఎదురు చూస్తున్న విషయం తెలిసిందే. మార్చి 25న ప్రపంచవ్యాప్తంగా గ్రాండ్ గా రిలీజ్ కాబోతోంది. ఇప్పటి నుంచే అభిమానులు హంగామా చేస్తున్నారు. బాహుబలి తర్వాత దర్శక దిగ్గజం రాజమౌళి తెరకెక్కిస్తున్న ఈ చిత్రంలో రాంచరణ్, ఎన్టీఆర్ సహా హేమాహేమీలు నటిస్తున్నారు.
ఇటీవలే కర్నాటకలోని చిక్ బళ్ళాపూర్ లో ఆర్.ఆర్.ఆర్ ప్రీ రిలీజ్ ఈవెంట్ గ్రాండ్ గా నిర్వహించారు. సీఎం బసరాజ్ బొమ్మై హాజరై… ఈ చిత్రాన్ని ఆకాశానికెత్తేశారు. ఇదిలావుంటే .. మరి కొన్నిగంటల్లో ఈ చిత్రం రిలీజ్ కానున్న నేపధ్యంలో కన్నడిగులకు ఆర్.ఆర్.ఆర్. టీమ్పై అంతులేని కోపం కట్టలు తెంచుకుంది. తమ రాష్ట్రంలో ఈ చిత్రాన్ని బహిష్కరించాలని కన్నడ వాసులు డిమాండ్ చేస్తున్నారు.
అందుకు కారణం.. కన్నడ భాషలో ఈ చిత్రాన్ని విడుదల చేయకపోవడమే. తెలుగు, తమిళం, హిందీ భాషల్లో ఆర్.ఆర్.ఆర్. చిత్రం విడుదలవుతోంది. అయితే కన్నడ భాషలో విడుదల చేయకపోవడంపై కన్నడిగులు ఆగ్రహం వ్యక్తం చేస్తున్నారు. ఇది తమ భాషను ఒకరకంగా అవమానించడమేనని మండిపడుతున్నారు.
కన్నడ భాషలో ఆ సినిమా విడుదల కానప్పుడు, ఇతర భాషల్లో ఎందుకు విడుదల చేయాలంటూ నిలదీస్తున్నారు. ఆ చిత్రాన్ని కర్ణాటకలో నిషేధం విధించాలని డిమాండ్ చేస్తున్నారు. దీంతో ఆర్.ఆర్.ఆర్ టీమ్ తలలు పట్టుకుంటోంది.