మొబైల్ ఫోన్ ఇప్పుడు అందరికీ ముఖ్యమైన వస్తువు.. ఎక్కడికి వెళ్లినా ఆ ఫోన్ కూడా వెంట తీసుకెళ్లడం మనకు అలవాటుగా మారిపోయింది. అయితే ఈ ఫోన్ ఒక్కసారిగా కనిపించకుండా పోతే మనం ఎంతగా బాధపడిపోతాం.. అదే కాస్తంత కాస్ట్ లీ ఐ ఫోన్ అయితే మరింతగా తల్లడిల్లిపోతాం. ఇలాంటి ఘటనే యూకేలో జరిగింది. డేవిస్ అనే వ్యక్తి 2021లో ఓ నది సమీపంలో మిత్రులకు బ్యాచిలర్ పార్టీ ఇచ్చాడు. ఈ పార్టీ జరుగుతున్న సమయంలో ఆ ఫోన్ నీళ్ళల్లో పడిపోయింది. నదిలో పడిపోయిన ఫోన్ పడిపోవడంతో చేసేదేమీ లేక ఇంటికెళ్లిపోయాడు. కొద్దిరోజుల తర్వాత ఆ ఫోన్ విషయాన్ని పూర్తిగా మర్చిపోయాడు.
అయితే దాదాపుగా ఈ ఘటన జరిగిన పది నెలల తర్వాత నీటిలోని ఐ ఫోన్ మరొక వ్యక్తి కంటపడింది. వెంటనే ఆ వ్యక్తి ఆ ఫోన్ ఎవరిదో తెలుసుకోవాలని ప్రయత్నించాడు. అయినా నీళ్లలో పడిన ఫోన్ ద్వారా అది సాధ్యం కాదు కదా అనుకుంటూనే.. ఎందుకైనా మంచిదని ఓసారి ఛార్జింగ్ పెట్టాడు. ఆశ్చర్యం.. ఆ ఫోన్ వెంటనే ఆన్ అయింది. అంతేకాదు.. ఆగస్ట్ 13వ తేదీతో డేవిస్ దంపతుల ఫోటో కూడా స్క్రీన్ సేవర్ గా కనిపించింది.
ఇంకేముంది వెంటనే ఆ వివరాలను సోషల్ మీడియాలో పంచుకున్నాడు. ఈ తతంగం మొత్తాన్ని పోస్టులో వివరించాడు. ఈ ఐ ఫోన్ పోస్ట్ ఫోటో వివరాలను చాలా మంది తమ వాల్స్ పై షేర్ చేశారు. చివరకు డేవిస్ కు తన మిత్రుల ద్వారా ఈ విషయం తెలిసింది. దీంతో ఆ వ్యక్తి వద్దకు వెళ్లి కృతజ్ఞతలు చెప్పి ఫోన్ తెచ్చుకున్నాడు.
అయితే 10 నెలల క్రితం నీటిలో పడిపోయిన ఫోన్.. ఇన్నిరోజులు తర్వాత కూడా ఎలా పని చేస్తుందన్న విషయం మాత్రం మిస్టరీగా మారింది.
