మొత్తానికి భలే ప్రారంభోత్సవం.. అతిధులు మనుషులే.. కాకపోతే ప్రారంభోత్సవం మాత్రం దున్నపోతు పేరుమీదనే జరిగింది.. దున్నపోతు ముఖ్య అతిధిగా , ఆ బస్ షెల్టర్ ప్రారంభం అవుతుందని ముందుగానే ప్రకటించారు. అనుకున్నట్ట్టే , మేళతాళాలమధ్య దున్నపోతు అక్కడికొచ్చింది.. బస్ షెల్టర్ ప్రారంభం అయింది.. నూతన గృహ ప్రవేశం గోవు తో చేసినప్పుడు , ఇలా కొత్త బస్ స్టాండ్ దున్నపోతుతో ప్రారంభం చేయడం తప్పా అని అనుమానం రావచ్చు.. కాకపోతే , ఈ దున్నపోతు చేత ఓపెనింగ్ చేయించింది , ఎమ్మెల్యే , ఎంపీ , అధికారుల నిర్లక్ష్యానికి నిరసనగా.. అదీ సంగతి.
అసలు విషయం ఏమిటంటే , కర్ణాటకలోని గడగ్ జిల్లా , భలే హోసూర్ అనే గ్రామంలో , ప్రజలు ఉమ్మడిగా కలిసి , దున్నపోతుని ముందుపెట్టి , గ్రామంలో బస్ షెల్టర్ ప్రారంభం చేశారు. ఈ షెల్టర్ పైకప్పు పడిపోయి పదేళ్ళయింది. ఎమ్మెల్యే , ఎంపీ , అధికారులు పదేళ్లుగా హామీలు ఇస్తూనే ఉన్నారు. పనిమాత్రం జరగలేదు. చివరకు ఆ షెల్టర్ ప్రాంతం చెత్త దిబ్బగా మారింది. దీంతో గ్రామస్తులే చందాలేసుకొని , పైకప్పు నిర్మాణం చేసుకున్నారు. ప్రారంభోత్సవ ఆహ్వాన పత్రంలో , దున్నపోతు ఫొటో వేసి , అదే ముఖ్య అతిధి అని ప్రచారం చేసి పనికానిచ్చేసారు.. అదీ సంగతి…
