చాలా మందికి కోడి కూయనిదే పొద్దెక్కదు. కానీ జర్మనీలో ఓ వృద్ధ జంట మాత్రం ఓ కోడి తమకు నరకం చూపిస్తోందంటూ కోర్టుకు ఎక్కారు. పక్కింట్లోని కోడి రోజూ రెండు వందల సార్లకుపైగా బిగ్గరగా కూత పెడుతోందని.. అది భరించలేకపోతున్నామని.. దాన్ని వెంటనే ఎక్కడికైనా తరలించేలా ఆదేశాలు ఇవ్వాలని కోర్టును కోరారు. ఈ విషయం ఇప్పుడు సోషల్ మీడియాలో వైరల్ గా మారింది.
జర్మనీలోని వోర్సెస్టర్ నగరానికి చెందిన మైఖేల్ అనే వ్యక్తి ఐదేళ్ల కింద పెంచుకునేందుకు కొన్ని కోళ్లను తెచ్చుకున్నారు. అందులో ఓ కోడి పుంజు ఉంది. చాలా యాక్టివ్ గా ఉండే ఆ కోడి పుంజుకు మాగ్డా అని ముద్దుపేరు పెట్టుకుని పెంచుకుంటున్నాడు.
అది నిత్యం కొక్కరకో అంటూ కూత పెడుతోంది. ఆ ఇంటి పక్కనే ఉండే 76 ఏళ్ల ఫ్రెడరిక్ విల్ హెం, ఆయన భార్య జుట్టాలకు మాత్రం ఈ కోడి కూత భరించలేని విధంగా తయారైంది. దీనిపై వాళ్లు మైఖేల్ కు చెప్పినా.. ఆ కోడి పుంజు లేకుంటే, కోడిపెట్టలు నియంత్రణ తప్పుతాయని, కోడి పుంజును ఎక్కడికీ తరలించేది లేదని స్పష్టం చేశాడు. ఇలా కొంతకాలం భరించిన ఫ్రెడరిక్, జుట్టా దంపతులు.. చివరికి కోర్టును ఆశ్రయించారు.
రోజూ రాత్రి కోళ్లను గూట్లోకి పంపే మైఖేల్.. మరునాడు పొద్దున 8 గంటలకు తన ఇంటి ఆవరణలోకి వదులుతాడు. అప్పటి నుంచి రాత్రిదాకా మాగ్డా కోడి పుంజు రెండు వందల సార్లు కూత పెడుతుందని ఫ్రెడరిక్ దంపతులు కోర్టుకు ఫిర్యాదు చేశారు. కోడి పుంజు ఏ సమయంలో కూతపెడుతోందన్నది కొద్ది రోజుల పాటు రాసి పెట్టి మరీ.. దాన్ని కోర్టుకు ఇచ్చారు. ఈ కోళ్ల బాధ తట్టుకోలేక పొరుగిళ్లలో ఓ ఫ్యామిలీ ఖాళీ చేసి వెళ్లిపోయిందని వివరించారు.
ఇంటి ఆవరణలో కూర్చోలేకపోతున్నాం. కనీసం కిటికీలు కూడా తీసి పెట్టుకోలేకపోతున్నాం. ఎప్పుడు చూసినా.. బిగ్గరగా కూత పెడుతూనే ఉంటుంది. ఆ కోడిని అక్కడి నుంచి తరలించాల్సిందే..” అని ఫ్రెడరిక్ పేర్కొన్నారు. దీనిపై వోర్సెస్టర్ నగర అధికారులు విచారణ ప్రారంభించారు. మైఖేల్ ఇంటి చుట్టుపక్కల వారిని అడిగితే.. తామంతా ఆ కోడి పుంజు వల్ల తీవ్రంగా ఇబ్బంది పడుతున్నామని చెప్పారు. మైఖేల్ కు ఈ విషయం చాలా సార్లు చెప్పినా పట్టించుకోలేదని అధికారులకు తెలిపారు. ఫోన్లు మాట్లాడుకోలేకపోతున్నామని, జూమ్ మీటింగుల్లోనూ డిస్ట్రబెన్స్ గా ఉంటోందని ఫిర్యాదు చేశారు. వీటన్నింటినీ పరిశీలించిన అధికారులు మైఖేల్ ను పిలిపించి.. అతడి కోళ్లను మరో చోటికి తరలించాల్సిందిగా ఆదేశించారు.
