నాగుపాముని నాగదేవత కొలిచే సంప్రదాయం మనది. నాగుల చవితి, నాగపంచమి, నాగపూర్ణిమ ఇలా నాగదేవతను ఆరాధిస్తూ పండుగలు కూడా జరుపుకుంటుంటాం. పుట్టలో పాలు పోసి కోరికలు కోరుకుంటాం. ఆ కోరికలు నెరవేరిన తర్వాత మొక్కులు కూడా చెల్లించుకుంటాం. అయితే ఒరిస్సాలోని భువనేశ్వరలో మాత్రం కొంతమంది మూఢభక్తితో నాగుపామును పూజ కోసం హింసించారు. పూజ పేరుతో ఆ పాము నోటికి ఫెవి క్విక్ వేసి అతికించారు. పాము నోరు తెరవకుండా, కాటు వేయకుండా ఉండేందుకు ఈ దారుణానికి పాల్పడ్డారు. అలా హింసిస్తూ ఆ పాముకి పూజలు చేశారు.
ఈ విషయం సోషల్ మీడియాలో వైరల్ కావడంతో వన్యప్రాణి సంరక్షకుల దృష్టికి వెళ్లడంతో అక్కడికి చేరుకున్నారు. ఆ పాముని పట్టుకుని నోటికి అంటుకుపోయిన గమ్ ను తొలగించారు. గోరు వెచ్చని నీటిలో నిమ్మరసం పించి, పాము తలను ఆ నిమ్మరసంలో కాసేపు ముంచారు. ఆ తర్వాత దాని తలను బయటకి తీసి… ఇయర్ బడ్స్ తో పాము నోటిపై రుద్దుతూ గమ్ ను తొలగించారు. దీంతో పాము నోరు యధాస్థానంలోకి వచ్చింది. వెంటనే ఆ పామును సమీపంలోని అడవిలో వదిలేశారు. ఈ అమానుషానికి పాల్పడిన వారిపై కేసులు నమోదు చేయించారు.